پٹنہ: بہار کے پٹنہ ضلع میں کورونا انفیکشن کے تیزی سے بڑھتے معاملوں پر لگام لگانے کیلئے دس جولائی سے ایک ہفتہ کے لئے لاک ڈاؤن نافذکرنے کافیصلہ لیا گیا ہے ۔ضلع مجسٹریٹ کمار روی نے بدھ کو یہاں بتایاکہ گذشتہ تین ہفتوںمیں پٹنہ ضلع میں کووڈ۔19 کے معاملے میں کافی اضافہ ہوا ہے ۔ کورونا انفیکشن کی توسیع کو روکنے کیلئے پورے ضلع میں دس جولائی سے 16 جولائی ایک ہفتہ تک لاک ڈاؤن نافذ کرنے کافیصلہ لیا گیا ہے ۔مسٹر روی نے بتایاکہ لاک ڈاؤن مدت میں ضلع کے سبھی پرائیوٹ اور تجارتی مراکز بند رہیںگے لیکن عوامی نظام تقسیم ( پی ڈی ایس ) سمیت خوردنی اشیاءکی دکانیں، پھل ، سبزی ، دودھ اور ڈیری ، گوشت ، مچھلی اور مویشیوں کے چارے کی دکانیں کھلی رہیںگی ۔
حالانکہ پھل ، سبزی اور گوشت ۔ مچھلی کی دکانوں کو صبح چھ بجے سے دس بجے تک اور شام چاربجے سے سات بجے تک کھولنے کی اجازت ہوگی ۔ضلع مجسٹریٹ نے کہاکہ ان کے علاوہ بینک اور انشورنش دفاتر ، اے ٹی ایم ، پرنٹ اور الیکٹرانک میڈیا ، ٹیلی مواصلات ، انٹر نیٹ اور اطلاعات و ٹیکنالوجی پر مبنی خدمات ، ای کامرس کے توسط سے اناج ، دوائیوں اور آلات کی ڈیلیوری ، پٹرول پمپ ، رسوئی گیس ، بجلی پیداواراور تقسیم ، کولڈ اسٹوریج اور ویئر ہاؤس ، پرائیوٹ سیکوریٹی خدمات ، صنعتی ادارے اور طبی خدمات بحال رہیںگی ۔مسٹر روی نے بتایاکہ اس دوران دفاع ، مرکزی سیکوریٹی فورس ، ٹریزری ، سی این جی ۔ ایل پی جی اور پی این جی ، آفات مینجمنٹ ، بجلی پیدوار اور تقسیم ، ڈاک گھر ، نیشنل انفارمیٹک سینٹر ، محکمہ موسمیات کے دفاتر کو چھوڑ کر سبھی سرکاری دفاتر بند رہیںگی ۔ حالانکہ اس دوران پولیس ، ہوم گارڈ ، شہری تحفظ ، فائر بریگیڈ اور ایمرجنسی خدمات ، آفات مینجمنٹ ، الیکشن اور جیل محکمہ کے دفاتر ، ضلع انتظامیہ ، پانی اور صفائی اور نگر پالیکا دفاتر کھلے رہیںگے ۔ نگر پالیکا دفاتر میں صرف صفائی عملے اور آبی سپلائی افسر ہی آئیںگے ۔ انہوں نے کہاکہ کھلے رہنے والے سرکاری دفاتر کم سے کم ملازمین کے ساتھ کام کریںگے ۔ دیگر سبھی دفاتر اپنے ملازمین اور افسران کو ورک فراہم ہوم کی سہولیات عطا کرسکتے ہیں۔ضلع مجسٹریٹ نے بتایاکہ ضلع کے جوڈیشیل آفیسر پٹنہ ہائی کورٹ کی ہدایت کے مطابق کام کریںگے ۔ انہوں نے بتایاکہ ضلع کے سبھی پرائیوٹ اور سرکاری اسپتال اور دوا کی دکانیں کھلی رہیںگی ۔ اس دوران میں سبھی پوجاپاٹ مقامات بند رہیںگے اور کچھ مستثنیات کو چھوڑ کر مذہبی پروگراموں کا انعقاد نہیں ہوگا۔غور طلب ہے کہ پٹنہ ضلع میں حالیہ دنوں میں کورونا انفیکشن کے ریاست میں سب سے ز یادہ 1349 معاملے ہیں ۔ وہیں انفکیشن سے بارہ لوگوں کی اموات ہو چکی ہیں۔ حالانکہ ابھی تک پٹنہ میں کل متاثرین میںسے 641 لوگ صحتیاب ہو کر اپنے گھروں کو لوٹ چکے ہیں۔

