بچوں کی موت سفاری انتظامیہ کی لاپرواہی کا نتیجہ : اکھلیش

0

اٹاوہ: اٹاوہ لاین سفاری میں شیر کے تین بچوں کی موت سے ناراض سماج وادی پارٹی (ایس پی) کے صدر اکھلیش یادو نے سفاری انتظامیہ کو کٹہرے میں کھڑا کرتے ہوئے کہا ہے کہ بچوں کی موت حکومت کی لاپرواہی کا نتیجہ ہے۔ سفاری مینجمنٹ اور ایسی ناتجربہ کار اور نااہل قیادت کو بدلنے کی ضرورت ہے۔
مسٹر یادو نے منگل کی شام کو ٹویٹ کیا، “اٹاوہ لاین سفاری میں شیر کے تین بچوں کی المناک موت کی ذمہ داری کا فوری طور پر تعین کیا جانا چاہیے۔ ناتجربہ کار اور نااہل قیادت کو تبدیل کیا جانا چاہیے کیونکہ حمل کی پیشگی اطلاع کے بعد بھی لاپرواہی برتی گئی۔ آئی وی آر آئی بریلی اور سی زیڈ اے کو اطلاع دے کر نہ تو طریقہ کار پر عمل کیا گیا اور نہ ہی پوسٹ مارٹم اور ان کی آخری رسومات کی گئیں۔
ایس پی سربراہ نے ایک ایسے وقت میں ٹویٹ کیا جب سفاری انتظامیہ سفاری میں تین بچوں کی موت پر پردہ ڈالنے کی کوشش کر رہی تھی۔ اٹاوہ سفاری پارک میں 6 جولائی کو دوپہر 1.53 بجے سونا نامی شیرنی نے پہلی بار ایک بچے کو جنم دیا، جس کے بعد شیرنی تقریباً 77 گھنٹے تک بچوں کو جنم دیتی رہی، اس واقعہ میں پانچ بچوں کی پیدائش ہوئی، لیکن ان میں سے تین بچوں کی موت ہوگئی۔
اگرچہ سفاری انتظامیہ نے تینوں بچوں کی موت کی تصدیق نہیں کی ہے، لیکن محکمہ انیمل ہسبنڈری کے ویٹرنری آفیسر ڈاکٹر منوج گپتا نے تصدیق کی کہ انہوں نے تینوں بچوں کا پوسٹ مارٹم اٹاوہ سفاری پارک میں کرایا ہے۔
سفاری کے ذرائع کا کہنا ہے کہ اٹاوہ سفاری پارک کی نئی ڈائریکٹر مسز دیکشا بھنڈاری نے 4 جولائی کو عہدہ سنبھالا اور 7 جولائی کو چھٹی پر چلی گئیں جو 13 جولائی تک چھٹی پر ہیں۔
ایس پی کے ضلع صدر گوپال یادو نے الزام لگایا کہ ایس پی سربراہ اکھلیش یادو نے دنیا کی مشہور لاین سفاری قائم کی ہے، لیکن جنگلات اور سفاری کے اہلکار جان بوجھ کر سفاری کو برباد کرنے پر تلے ہوئے ہیں، تین بچوں کی موت کو چھپانا بہت سنگین جرم ہے۔
پرنسپل چیف کنزرویٹر آف فاریسٹ اور محکمہ کی سربراہ ممتا سنجیو دوبے نے کہا کہ دو بچے مردہ پیدا ہوئے ہیں۔ دو بہت کمزور تھے۔ ان میں سے ایک کو بچا بھی لیا گیا ہے۔ پہلا بچہ بھی صحت مند ہے۔ ڈاکٹروں کی موجودگی میں اس پورے عمل کی مسلسل نگرانی کی گئی۔ ہماری پہلی کوشش یہ ہے کہ شیرنی اور باقی دو بچے بھی صحت مند رہیں۔ اس کے بعد ڈلیوری کے اتنے طویل عمل کا تجزیہ کریں، تب ہی آگے کچھ کہا جا سکتا ہے۔

LEAVE A REPLY

Please enter your comment!
Please enter your name here