

دوحہ: وزیراعظم نریندرمودی ’خودکفیل ہندوستان مہم‘ کو عالمی سطح پر نئی اونچائیوں پر لے جانے میں مصروف ہیں۔ یہ باتیں وزیرخارجہ ڈاکٹر ایس۔جے شنکر نے اپنی دوروزہ دورے پر خلیجی ملک قطر میں کہی۔
انہوں نے اپنے قطری ہم منصب کے ساتھ دونوں ممالک کے درمیان دو طرفہ تجارت کو بڑھانے پر تفصیل سے بات چیت کی۔ میٹنگ میں جے شنکر نے قطر کے نائب وزیراعظم اور وزیرخارجہ شیخ محمد بن عبدالرحمان بن جاسم الثانی سے دوطرفہ، علاقائی اور بین الاقوامی امور پر بات چیت کی۔ اس کے بعد انہوں نے قطرنیشنل میوزیم کا بھی دورہ کیا۔
ڈاکٹر ایس۔ جے شنکر کے اس دورے کے سلسلے میں وزارت خارجہ کی طرف سے ایک بیان بھی جاری کیا گیا۔ جس میں بتایا گیا ہے کہ بطور وزیرخارجہ ایس جے شنکر کا پہلا قطر کا دورہ ہے۔ جس کی ابتدا انہوں نے گول میز کانفرنس سے کی۔ جس میں انہوں نے دونوں ممالک کے درمیان تجارت اور شراکت داری کو مضبوط کرنے کے عزم کے سلسلے میں وہاں کے کاروباریوں کی تعریف کی۔
اس دوران انہوں نے کہا کہ ہندوستان اب خودکفالت کے راستے پر تیزی سے بڑھ رہاہے۔ اس لئے وہاں سرمایہ کرکے آپسی رشتوں کو مضبوط کیا جاسکتا ہے اور فائدہ اٹھایاجاسکتا ہے۔ اس کے ساتھ ہی انہوں قطر چیمبر آف کامرس اینڈ انڈسٹریل (کیو سی سی آئی) اور قطر بزنس ایسوسی ایشن (کیو بی اے) کے چیئرمین شیخ خلیفہ اور شیخ فیصل سے ملاقات کرکے ان کا شکریہ ادا کیا۔
واضح رہے کہ ہندوستان اور قطر کے تعلقات بہت قریبی ہیں۔ دونوں ممالک کے مابین مضبوط معاشی،ثقافتی اور شہری سطح پر رشتے ہیں۔ سات لاکھ سے زیادہ ہندوستانی وہاں کام کرتے ہیں۔ جو وہاں کی ترقی میں اہم رول ادا کررہے ہیں۔ 20-2019 میں دونوں ممالک کے درمیان 10.95بلین ڈالر (80 ہزار کروڑ) روپے کی تجارت ہوئی۔
