کورونا:دہلی و مرکزی حکومت کے خلاف کانگریس کا احتجاج کل

0

نئی دہلی:کورونا وائرس (کووڈ-19) کی سنگین صورتحال سے نمٹنے میں بھارتیہ جنتا پارٹی کی زیرقیادت مودی حکومت اور دہلی کی کیجریوال حکومت کی ناکامیوں کے خلاف احتجاج کرنے کے لئے دہلی کانگریس کی جانب سے منگل کے روز یہاں ایک دھرنا پروگرام کا انعقاد کیا جائے گا۔
پارٹی کی طرف سے جاری اعلامیے کے مطابق ریاستی صدر چودھری انیل کمار کی سربراہی میں کانگریس کارکنان اپنے گھروں کے باہر’عوام کے بیچ-گھر کی دہلیز پر’ پروگرام کے ایک حصے کے طور پر اپنے ہاتھوں میں کالی پٹی باندھ کر کووڈ-19 کی صورتحال سے نمٹنے میں مودی حکومت اور دہلی کی عام آدمی پارٹی حکومت کی ناکامیوں کے خلاف صبح 10.15 سے صبح 11 بجے تک دہلی بھر کے 1000 سے زیادہ مقامات پر دھرنا دیں گے۔
مسٹر انیل کمار نے کہا کہ بی جے پی کی مودی حکومت اور دہلی کی کیجریوال حکومت نے بالآخر اس بات کو قبول کرلیا جو دہلی کانگریس گزشتہ کئی ہفتوں سے مستقل طور پر کہہ رہی تھی کہ دونوں حکومتوں کی نااہلی اور ناکامی کی وجہ سے دارالحکومت دہلی میں کووڈ -19 کی وبا تیزی سے بڑھ گئی ہے۔ انہوں نے کہا کہ کورونا وائرس کے بہت کم ٹیسٹ ہوئے ہیں۔ کورونا وائس سے متاثرہ مریضوں کے لئے اسپتالوں میں بستروں کی کمی حکومتوں کی ناکامی اور انتظامی نا اہلی کی وجہ سے ہوئي جس سے دہلی کے عوام خوفزدہ ہیں۔ انہوں نے کہا کہ کووڈ -19 وبائی بیماری کے لاک ڈاؤن کے ابتدائی مرحلے میں حکومت نے قیمتی وقت ضائع کیا ہے۔
مرکزی وزیر داخلہ امیت شاہ کے ساتھ آج ہونے والی کل جماعتی میٹنگ میں مسٹر انیل کمار نے کانگریس پارٹی کی طرف سے تجویز پیش کی کہ دہلی حکومت کے نئے امبیڈکر اسپتال، براڑی اسپتال اور دوارکا میں واقع اندرا گاندھی اسپتال کو جن کی صلاحیت 2609 بستروں کی ہے اور جن کی تعمیر مکمل ہوچکی ہے، انہيں کورونا مریضوں کی بڑھتی ہوئی تعداد کے لئے بستروں کی کمی کے پیش نظر ، فوری طور سے کھول دیا جائے۔ انہوں نے کہا کہ کانگریس پارٹی کو اس بات کی خوشی ہے کہ دہلی کے لیفٹیننٹ گورنر کے ساتھ کل جماعتی اجلاس میں کانگریس کی تجاویزکو قبول کرلیا گیا کیونکہ اس پردہلی کے شہری کا حق ہے۔ انہوں نے کہا کہ اگرچہ بی جے پی اور عام آدمی پارٹی نے اس میٹنگ میں ایک دوسرے کی پیٹھ تھپتھپانے کی کوشش کی تھی، لیکن دہلی کے عوام بخوبی جانتے ہیں کہ مرکز اور دہلی دونوں حکومتیں کووڈ کی وبا سے نمٹنے میں مکمل طور پر ناکام ہوچکی ہیں۔
کانگریس لیڈر نے یہ بھی مطالبہ کیا کہ دہلی حکومت نے محکمہ صحت سے وابستہ عملہ اور پولس اہلکاروں سمیت کورونا واریئرس، جو ڈیوٹی کرتے ہوئے فوت ہوجائے، ان کو معاوضہ دینے کا وعدہ کیا تھا، ان کے اہل خانہ کے حوصلے بلند کرنے کیلئے انہیں بلا تاخیر معاوضہ دیا جائے۔

LEAVE A REPLY

Please enter your comment!
Please enter your name here